Hnahthial the 8th February 2024: Special Summary Revision 2024 neih zawh tak hmanga buatsaih 29-South Tuipui AC final electoral roll chu vawiin khan Hnahthial District Dy DEO, Addl DC ni bawk Pu Lalvenhima chuan a tlangzarh a, political party hrang hrang aiawhte hnenah copy 2 theuh a pe chhuak nghal.
E-roll tlangzarhtu Dy DEO Pu Lalvenhima chuan chuan final roll tluang taka peihfel a ni ta chu lawmawm a tih thu a sawi a, inthlanna felfai tak nei tur chuan roll felfai a pawimawh hle tiin roll felfai neih theih nana theihtawp chhuahtu election branch-te chungah lawmthu a sawi. Inthlanna thianghlim leh muanawm tak a awm theih nan duhsakna a hlan nghal.
Vawiina tlangzarh tak final roll in a tarlan danin 29-South Tuipui AC-ah hian vote nei mi 16,257 an awm a, Mipa vote nei 8022 awmin hmeichhe vote nei 8235 an awm a ni. Service voters mi 87-te nen chuan vote nei zawng zawng chu 16,344 an awm a ni. Vawiina tlangzarh tak final roll hi draft roll nen khaikhinin vote 4 in a kiam a, hei hi e- roll a demographically similar entry (DSE) te paih vang a ni. 29/9 Hnahthial IV Polling Station-ah voter tam berin mi 1223 an awm a, 29/23 New Kawnpui-ah tlem berin vote nei mi 56 an awm thung a ni.
29-South Tuipui AC final roll tlangzarh inkhawmah hian Dy DEO Pu Lalvenhima bakah Election Officer Pu Lalbiakfela, NGO aiawhte, BLO te, party aiawhte leh chanchinbumite an tel a ni.
